Програмата повторно инспирира да ги наострите пантофките, да наполните ранец со пуканки и да шверцате благца, да се ставате у паника дека можеби и ќе нема карта баш за вашиот филм, дека ќе ви дадат место со гулабите или гратис ќе ви се погоди тетката со ладна што ви ја уништува уметничката фотографија... и сето ова за подвижните слики кои траат реално време од час и половина, а филмски да се издолжуваат до еден животен век.

Главна програма се наградуваните наслови на режисерите: Вес Андерсон („Кралството на месечината“), Гас ван Сант („Ветена земја“), Томас Винтерберг („Лов“), Роџер Мичел („Хајд парк на Хадсон“), Мартин МекДона („Седум психопати“), Николај Арсел („Кралска афера“)...; кои ќе го предизвикуваат моментот на изненадување со тоа што со вашето ќесиче со пуканки ќе ги сервираат нивните идеи, фотографии, приказни, и на поинакво ниво ќе разговараат со вас.

Фестивалот го отвори филмот на Срдан Голубовиќ, Кругови. Ако филмот може или да ве насмее или да ве расплаче, тогаш Кругови нема да ви стави насмевка, но ќе ви предизвика тешка емоција да не знаете кој крај од себе да го фатите, да ги премерувате моралните вредности, во крајна линија да престанете да се криете дека понекогаш си поплачувате на филмче. „Кај нас нема мали теми. Нашите драми се подраматични, нашите животи се подраматични.” Срдан на прес-конференцијата, ни остави за домашна да размислуваме за простувањето како двонасочен процес и поголемата моќ на емоцијата отколку зборот во меѓучовечката комуникација.  Ве молам, исклучете ги клишеата и пипнете ги круговите направени од камчето фрлено во вода.

Еј, абе оваа уметност се јаде сирова, со раце, се проголтува секој дел и тек потоа со аристократски манири се брише лицето и се полира впечатокот. Така де, она што филмот ви го прикажува е моменталната вистина и ќе го земете како аспирин со чаша вода, а тоа дали ќе имате различни толкувања... е со тоа сами ќе се борите со кој дел од вас приказните ќе се поистоветат. 

Пижамите дома, даљинското у ташна а пантофките у срце, идеја за ќебенце и бандата под рака. Кој е гладен за филм, на вечера на Скопски Филмски Фестивал 2013 од 19 до 27 Април.

Веб – страна: http://www.skopjefilmfestival.com.mk/

Дизајн на промотивен материјал е емоцијата наречена – Ване Костуранов

Сеаќевидиш